تعرض لاعب التنس البريطاني آندي موراي للسرقة بعدما شفرو ليه خاتم الزواج وسبرديلتو.

الحادثة وقعات نهار الخميس ملي كان السيد راجع من بطولة إنديانا ويلز، حيد سبرديلتو وخلاها تحت الطوموبيل على برا دلوطيل باش تنشف من العرق لكن فالصباح لقى غير البرد.

آندي داخ ملي تفكر أنه كان رابط خاتم الزواج في سبرديلتو، ودار بوسط في “أنستكَرام “كيطلب فيه اللي لقاه يرجعو ليه باش يعاونوه يرجع الأمور لمجاريها مع مراتو اللي كاعية على هادشي اللي وقع.

ومن بعد مشاركة المتتبعين ديالو لهاد القصة و للطلب ديالو، وبشكل مفاجئ، رجعو ليه سبرديلتو وخاتم العرس. أندي فرح بـ”المفاجأة” ولكن ماذكرش تفاصيل كثر على كيفاش عاود لقا السبرديلة و الخاتم.

و فالمقابل لاعب التنس البريطاني شكر كل من تعاون معاه خصوصا فـ البارطاج ديال الشي اللي وقع.